Ladki Bahin Yojana KYC Update | राज्यातील लाखो महिलांच्या खात्यात दरमहा १५०० रुपये जमा करणाऱ्या ‘लाडकी बहीण’ योजनेबाबत सध्या एक मोठी अपडेट समोर आली आहे. गेल्या दोन-तीन महिन्यांपासून अनेक भगिनींच्या खात्यात योजनेचे पैसे जमा झालेले नाहीत. बँक खात्यात पैसे का येत नाहीत? आपला अर्ज बाद झाला की काय? अशा चिंतेत असलेल्या महिलांसाठी आता सरकारने पुन्हा एकदा संधी उपलब्ध करून दिली आहे.
नेमकं काय घडलं?
योजनेचा लाभ खऱ्या गरजूंपर्यंत पोहोचावा यासाठी सरकारने ई-केवायसी (e-KYC) बंधनकारक केली होती. मात्र, ही प्रक्रिया करताना अनेकींची धावपळ झाली. कोणाकडे मोबाईल नव्हता, तर कुठे इंटरनेटची रेंज नव्हती. ग्रामीण भागात अनेक महिलांनी सायबर कॅफे किंवा मध्यस्थांच्या मदतीने ही माहिती भरली. पण घाईघाईत काही तांत्रिक प्रश्नांची चुकीची उत्तरे दिली गेल्याने हजारो महिलांचे हप्ते थांबले आहेत. यात प्रामुख्याने कुटुंबातील सरकारी नोकरी किंवा पेन्शनबाबतच्या प्रश्नांचा समावेश होता.
आता काय करायचं? पुन्हा सुरू झाली प्रक्रिया
महिलांचा वाढता रोष पाहता, महिला व बालविकास विभागाने आता ही ऑनलाइन प्रक्रिया पुन्हा सुरू केली आहे. आता तुम्हाला लांबच लांब फॉर्म भरण्याची गरज नाही. फक्त तुमच्या आधार क्रमांकावर येणारा ओटीपी (OTP) टाकून लॉगिन करायचे आहे आणि खालील दोन महत्त्वाच्या प्रश्नांची योग्य उत्तरे द्यायची आहेत:
१. तुमच्या कुटुंबातील कोणी सदस्य सरकारी विभागात किंवा स्थानिक स्वराज्य संस्थेत कायमस्वरूपी नोकरीला आहे का?
२. तुमच्या कुटुंबातील कोणी सदस्य सरकारी सेवेतून निवृत्त होऊन पेन्शन घेत आहे का?
सावधान! माहिती खरीच भरा
अनेक महिलांनी आधी या प्रश्नांना चुकीच्या पद्धतीने ‘नाही’ म्हटले होते, पण पडताळणीत माहिती वेगळी निघाल्याने त्यांचे पैसे थांबले. आता ही माहिती भरताना विशेष काळजी घ्या. कारण, जर माहिती खोटी आढळली तर कडक कारवाईचे संकेतही प्रशासनाने दिले आहेत.
ज्यांचे पैसे रखडले आहेत, त्यांनी त्वरित आपली केवायसी अपडेट करून घ्यावी. घरातील सुशिक्षित मुलांची किंवा ओळखीच्या व्यक्तीची मदत घेऊन ही प्रक्रिया पूर्ण करा, जेणेकरून पुढचा हप्ता तुमच्या खात्यात विनाअडथळा जमा होईल. शेवटी, हक्काचे पैसे आहेत, थोडे लक्ष दिले तर नक्कीच मिळतील!